تناتيــــــــش

[b]
تناتيش

محسن حسنين

أكتوبر : 16 - 10 - 2011

* شاب غضبان قال على الفيس بوك: اللى مش عاجبه المساجد يروح يقعد فى أمريكا.. واللى مش عاجبه منظر الكنايس يروح

يقعد فى السعودية.. واللى بيترحم على أيام مبارك وعياله.. يروح يقعد معاهم فى طرة..!

أما الناس اللى باقية.. ف «يلا بينا» نبنى بلدنا ويكون عندنا إيجابية..!
بصراحة أنا باضم صوتى لصوت هذا الشاب الجميل.. الغضبان.. فأنا لم أذهب لأمريكا ولا السعودية لكننى هاأقعد أبنى بلدى!!

* واحد بعت لى على الإيميل زعلان قوى من اللى قلته على الدكتور حازم صلاح أبو إسماعيل الأسبوع اللى فات..!

كان من الممكن أن أنشر كلام هذا «الواحد»، لكننى خايف أخدش الحياء العام لأنها كلها شتايم من قاموس الست «أم لالو»!

وكان من الممكن أن أنشر اسم هذا «الواحد».. لكنه للأسف لم يكتبه لأنه مكسوف؛ لأنه ماشى ببطاقة «بنت خالته»..!!

* كل ما أسمع أغنية يا «جمال» يا حبيب الملايين.. بالاقى نفسى طاير فى السما..!

طبعاً أنا قصدى «جمال» عبد الناصر.. مش «جمال» التانى.. الشر بره وبعيد!!

* بعد ضياع الكأس من الزمالك.. مش عارف ليه افتكرت المثل اللى بيقول: الموكوس.. موكوس.. ولو علقوا على راسه

فانوس..!!

* بالمناسبة.. عصام عبده معلق قناة دريم الذى علق على مباراة نهائى الكأس بين إنبى والزمالك.. قدم لنا معلومات مفيدة جداً..

فقد أكد أن الزمالك لو فاز فسيحصل على الكاس على طول.. أما إنبى فلو فاز بالمباراة فسيحصل أيضاً على الكاس..!

وهى معلومات مفيدة جداً وجديدة جداً.. ويبدو أن لوائح الكاس قد تم تعديلها بحيث إن اللى يفوز بالنهائى يحصل على الكاس..

إيه الحلاوة دى..؟!!

* كلمات من زمن فات:

أستأذن قارئى العزيز فى استحضار ذاكرة ما كتبته عن الفساد والفاسدين والتى تؤكد أننى كنت واقفاً فى ميدان التحرير على

مدى 18 عاماً مضت، لم يسلم فيها وزير ولا غفير من سن قلمى:

* واضح إن الحكومة شغالة بيع عمال على بطال.. فبعد بنك الإسكندرية وعمر أفندى هايبيعوا بنك القاهرة لمستثمر رئيسى..

ومين عارف الدور على مين بعد كده؟

مش ناقص غير إنهم يبيعوا الشعب لمستثمر رئيسى..!

يا جماعة.. كل واحد ياخد باله من «لغلوغه»!!

«نشرت فى 15 يوليو عام 2007»

* صدق اللى قال: خيل الحكومة أعرج وأعوج.. لكنه صياد!!

ففى الوقت الذى أكلت فيه الحكومة وهضمت فلوس الغلابة من أصحاب المعاشات والتأمينات بدون أى هنا أو شفا.. ليها عين

تطالب بديونها المعدومة اللى بقى لها عشرات السنين ماحدش عارف لها أصل من فصل..!

هذا الكلام معناه حاجة واحدة بس.. إن الحكومة بيتها من قزاز.. ومصرّة تحدّف الناس بالطوب..!

«نشرت فى 15 أبريل عام 2007»
[/b
]